Nesta entrada queremos presentar os resultados da implantación durante este curso escolar dos Proxectos Babot no Divino Maestro de Lugo, no que participaron todos os cursos de Infantil, Primaria e Secundaria.
Posto que a cidade de Lugo é paso do Camiño de Santiago, os e as docentes de Infantil e Primaria aproveitaron os nosos proxectos para traballar cos seus alumnos e alumnas aspectos relacionados con el.
Os cursos 4º, 5º e 6º de Infantil participaron nos proxectos A nosa guía de viaxe, na que o produto final foi un gran mapa dos Camiños de Santiago. Ademais investigaron sobre a contorna, a gastronomía e curiosidades. Unha experiencia moi enriquecedora para mestras e alumnado, coma podedes ver nestas imaxes.
1º e 2º de Primaria levaron a cabo os proxectos A nosa contorna natural, proxecto que tamén relacionaron co Camiño de Santiago, sendo o produto final a participación dos rapaces e rapazas na gran feira de turismo organizada no colexio, no que presentaron información recadada durante o proxecto relacionada coa fauna e flora. Un gran traballo de investigación que aportou gran cantidade de información interesante á feira. Ademais, os rapaces e rapazas de 2º organizaron un contacontos!
Os alumnos e alumnas de 3º e 4º de Primaria participaron no proxecto O robot viaxeiro, co obxectivo de organizar unha gran feira de turismo sobre o Camiño de Santiago, na que participaron os demais cursos de Primaria. Investigaron acerca de aspectos relacionados coa gastronomía, folclore, patrimonio cultural, personaxes históricos... Estes proxectos tiñan de invitados a o robot Zowi e mBot, que lles axudaron a iniciarse na robótica educativa e na programación informática. Deixamos unhas imaxes da gran feira de turismo!
Os grupos de 5º e 6º de Primaria participaron nos proxectos O cine, co obxectivo de realizar unha curtametraxe documental sobre o Camiño de Santiago. Investigaron sobre os aspectos que poderían introducir nos documentais, tomando decisións, elaborando o guión, participando na rodaxe, etc. Unha vez producidos as curtametraxes foron presentadas á comunidade educativa na gran feira de turismo, causando gran impresión entre o público asistente.
Por último, os alumnos e alumnas de 1º, 2º, 3º e 4º da ESO tamén participaron nos proxectos O cine. Elaboraron curtametraxes en Lingua Galega relacionadas cunhas temáticas moi interesantes: autoestima, solidariedade, convivencia e igualdade. O proxecto rematou cunha gran gala final ao estilo dos Óscar, no que os proxectos escollidos de cada curso alzaban estatuíllas á mellor banda sonora, mellor guión, mellor interpretación, mellor realización e mellor curtametraxe. Todo un éxito que ata foi noticia na Voz de Galicia!
Foto de Alberto López para a Voz de Galicia
Temos que facer unha mención especial á entrega e dedicación dos mestres e das mestras do Divino Maestro, xa que foron capaces de motivar, guiar e acompañar ao seu alumnado para levar a cabo todos estes proxectos. O proceso foi altamente enriquecedor para o alumnado e profesorado e esperamos que servira de motivación para arrincar con novos proxectos durante os vindeiros cursos.